InDefence hópurinn sendi fjárlaganefnd Alþingis umsögn um Icesave 3 samningana þann 10. janúar 2011. Í umsögninni er m.a. fjallað um jákvæðar breytingar frá fyrri samningum og fjárhagslega áhættuþætti vegna samninganna (m.a. gjaldmiðlaáhættu og hraða innborgana á höfuðstól) og ítarlega fjallað um áhrif jafnstöðuréttar samningsaðila (Pari passu). Gerðar eru athugasemdir við greinargerð með frumvarpinu og lögð áhersla á að áhrif dómstólaleiðar verði metin á skýran hátt. Einnig er sýnt fram á að íslenski tryggingasjóðurinn (TIF) var á engan hátt frábrugðinn tryggingasjóðum ESB ríkja og innistæðutryggingakerfi Evrópusambandsins gerð skil í viðauka.

Umsögn InDefence hópsins má hlaða niður í heild sinni hér, en niðurstöður umsagnarinnar eru svo hljóðandi:

7. Niðurstöður.

Allt frá því að þjóðin hafnaði með afdráttarlausum hætti fyrri Icesave samningunum þann 6. mars 2010 hefur málflutningur InDefence hópsins verið óbreyttur. Hagsmunir allra samningsaðila í Icesave deilunni kunna að fela það í sér að samningur um lausn málsins sé eðlilegri niðurstaða en að hafa umrædda milliríkajdeilu óleysta. Grundvallaratriði sé hins vegar
að slíkur samningur endurspegli þá þrjú meginatriði:

1. Að ekki sé lögbundin greiðsluskylda að baki kröfum Breta og Hollendinga.
2. Að samningar feli í sér skipta ábyrgð allra samningsaðila.
3. Að samningar feli í sér skipta áhættu allra samningsaðila.

Að mati InDefence hópsins endurspegla núverandi samningar ekki þessa þætti með fullnægjandi hætti. Hins vegar telur InDefence hópurinn að núverandi samningar feli í sér ýmsar úrbætur frá fyrri samningi. Helstu áhættu- og óvissuþættir eru enn til staðar frá fyrri samningum að mati InDefence hópsins. Einnig verður að hafa í huga að lögmæt greiðsluskylda
að baki kröfunum er ekki til staðar.

Helstu áhættuþættirnir lúta að gengisáhættu og áhættu á matsverði eigna þrotabús Landsbanka Íslands, þótt óvissa um virði eigna LÍ sé minni en áður. Auk þeirrar áhættu veit enginn raunverulega á þessu stigi hve langt er í að greiðslur inn á höfuðstól skuldarinnar hefjist. Hve langt verður tímabilið sem vextir safnast á Icesave skuldbindingu þjóðarinnar án þess að
nokkuð greiðist á höfuðstól lánsins? Forsendur samninganefndarinnar um að greiðslur inn á höfuðstól úr þrotabúi LÍ geti hafist innan skamms tíma verða að teljast í bjartsýnara lagi.

InDefence hópurinn hvetur stjórnvöld til þess að birta opinberlega allt mat sem gert var á lagalegri stöðu Íslands á meðan á samningaviðræðunum stóð. Einungis þannig geta íslensk stjórnvöld sýnt þegnum sínum að þau hafi samið þannig að niðurstaðan sé betri en útkoman úr hugsanlegum málaferlum. Ekkert slíkt mat hefur enn verið birt og því er enn ekki hægt að taka afstöðu til mikilvægra þátta málsins.

Við meðferð fjárlaganefndar á fyrirliggjandi frumvarpi er algjört grundvallaratriði að farið verði ítarlega ofan í álit starfshóps fjárlaganefndar undir forystu Stefáns Más Stefánssonar lagaprófessors. Komi í ljós að áhættan sé ásættanleg við að láta reyna á það grundvallaratriði þessa máls hvort greiðsluskylda íslenskra skattgreiðenda á tugum milljarða sé yfirleitt fyrir hendi áður en sú greiðsluskylda er samþykkt með samningi, á það að vera fyrsti kostur íslenskra stjórnvalda að láta reyna á lögmæti  krafnanna.

Sé það mat starfshópsins að áhætta af dómsmáli sé mikil og feli í sér verulega skerðingu á hagsmunum þjóðarinnar, bendir InDefence hópurinn á eftirfarandi: Að mati InDefence hópsins má mæta stærstu áhættuþáttum samningsins með einni breytingu á núverandi samningsdrögum, enda fælist í þeirri breytingu að kostnaður og áhætta íslenskra skattgreiðenda myndi minnka verulega.

Sú breyting felur í sér að í stað þess að núverandi samningar kveði á um heimild Íslands til að leita til dómstóla með þá kröfu hvort íslenskur gjaldþrotaréttur eigi að gilda og íslenski tryggingasjóðurinn njóti forgangs til eigna þrotabús Landsbankans við greiðslur lágmarkstryggingarinnar, þ.e. 20.887 evra, endurspegli samningurinn einfaldlega réttindi sjóðsins að íslenskum lögum og ákvæðum umræddrar tilskipunar og kveði beinlínis á um forgangsrétt íslenska innstæðutryggingasjóðsins til eigna úr þrotabúi Landsbankans.

Í þessari breytingu felst að samningarnir eru færðir að gildandi íslenskum gjaldþrotalögum, ákvæðum innstæðutilskipunar Evrópusambandsins nr. 94/19/EB og ákvæðum laga nr. 98/1999 um innstæðutryggingar og tryggingakerfi fyrir fjárfesta. Jafnstöðusamningar milli aðila verði þannig felldir úr gildi.

Hér er um að ræða réttmæta og eðlilega breytingu á fyrirliggjandi samningsdrögum, sem felur ekkert annað í sér en að samningaðilar fari að gildandi lögum og skráðum leikreglum evrópsku innstæðutilskipunarinnar sem allt Icesave málið byggir á. Þetta á að vera krafa íslenskra stjórnvalda ef gera á samning án þess að skorið sé úr um lögmæti greiðsluskyldunnar.
Einnig leggur InDefence hópurinn á það ríka áherslu að áður en núverandi samningsdrög verða afgreidd af Alþingi verði þau borin undir lánsmatshæfisfyrirtækin, til að full vissa fáist um það fyrirfram að lánshæfismat Íslands muni ekki falla verði samningsdrögin staðfest.

Auk þessa minnir hópurinn á að gjaldmiðlaáhætta skapast, verði samningsdrögin samþykkt í núvernaid mynd, vegna misræmis í skiptingu eigna þrotabús LÍ og skuldbindinga TIF eftir gjaldmiðlum auk þess sem krafa TIF á LÍ er skráð í krónum. Lagt er til að Seðlabanka Íslands verði falið að athuga gerð skiptasamninga til að verja áhættu vegna innbyrðis hreyfinga erlendra
gjaldmiðla.